Këngëtarja Ronela Hajati e cila do të përfaqësojë Shqipërinë në Eurovision 2022 ka nisur provat në Itali. Ronela do të hapë festivalin europian me këngën “Sekret” në natën e parë të gjysmëfinales.
Këto ditë, në Torino të Italisë kanë nisur provat zyrtare për shfaqjen e madhe. Disa nga momentet e provave janë ndarë edhe me ndjekësit në rrjetet sociale. Faqja e Eurovisionit në Instagram publikoi disa fotografi nga provat e Ronelës sot, të cilat e tregojnë këngëtaren shqiptare krahas balerinëve teksa dhuron një performancë të zjarrtë.
Këngëtarja gjithashtu ka ndarë disa nga fotografitë me ndjekësit e saj në Instagram ku krahas fotos shkruan: “Provat e para, të mbaruara, Shqipëria hap mbrëmjen e 10 majit”.
Eurovision 2022 nis më datë 10 Maj e cila do të jetë nata e parë e gjysmëfinales, 12 Maj nata e dytë gjysmëfinale dhe përfundon 14 Maj e cila është edhe finalja e madhe.
