Skuadra e Juventus-it pritet të humbasë shërbimet e Matthijs de Ligt-it këtë verë. Holandezi është pranë kalimit te Bayern Munich.
Kalidou Koulibaly i Napoli-t ishte zgjedhja e parë e bardhezinjëve për të zëvendësuar De Ligt-in, por ai kaloi te Chelsea. Situatë e ngjashme duket dhe me Gleison Bremer-in e Torino-s. Braziliani është pranë Inter-it.
Në këto kushte, sytë e “Zonjës së Vjetër” janë hedhur nga mbrojtësi spanjoll i Villarreal-it, Pau Torres.
Sipas gazetarit italian, Luca Momblano, Juventus-i ka dërguar ofertën e parë në drejtim të klubit spanjoll për mbrojtësin, 35 milionë euro plus bonuse. Për lojtarin do të ketë kontratë me 4 milionë në sezon.
Sezonin e fundit, Torres u aktivizua në 46 ndeshje me Villarreal-in në të gjitha garat, ku realizoi gjashtë gola dhe një asistim.
Ai ishte në fushë në dy përballjet e raundit të 16-ve në Champions League përballë Juventus-it sezonin e fundit. Madje realizoi një nga tre golat (3-0) e “nëndetëses së verdhë” në Torino.
/Albanianpost.com