Partitë opozitare në Prizren dhe Bashkimi Demokratik që udhëhiqet nga Zafir Berisha, nuk kanë marrë pjesë në ceremoninë e betimit të Ramadan Mujës si kryetar i Prizrenit.
Zafir Berisha thekson se dihet qartë arsyeja pse BD’ja e tij sot ka vendosur të mos jetë pjesë e kësaj seance. Thotë se partia e tij nuk merr pjesë në ceremonitë e një Qeverie që përbëhet nga krimi e nga korrupsioni.
“Qeveria e Prizrenit është Qeveri e të pandehurit e krimit dhe korrupsionit. Prandaj arsyeja po dihet, ne nuk marrim pjesë ku është një njeri i pandehur”, ka thënë Berisha Për Express.
Dhe për ta bind më shumë Berishën që të mos marr pjesë sot në betimin e Mujës, është fakti se në gjykimin që po zhvillohet ndaj Mujës, ai vet e ka pranuar që e ka shkel ligjin.
“Kështu që nuk e kemi parë të arsyeshme të rrimë në seancë gjatë betimit të tij kur ai jep betim derisa e ka shkel ligjin”.
Prandaj Berisha beson dhe është i bindur që Ramadan Muja nuk do të jetë në gjendje ta çojë mandatin që e fitoi me 1 dhjetor deri në fund.
Vlerëson se, nëse ka shtet, ligj edhe drejtësi Muja do të burgoset dhe Prizreni do të shkojë në zgjedhje të jashtëzakonshme. Dhe beson se diçka e tillë do të ndodh shumë shpejt.
“Ne po presim veç seancën kur atij do t’i konfirmohet dënimi dhe të burgoset dhe natyrisht që Prizrenit të shkojë në zgjedhje të jashtëzakonshme” thotë Berisha.
Vlerëson se e kundërta nuk mund të ndodh.
“Një njeri që e ka shkel ligjin, gjyqtari se merr parasysh…kjo nuk mund të ndodh”, tha Berisha i BD’së.