Boksieri britanik Anthony Joshua, ish-kampion bote në peshën e rëndë, ka deklaruar se karrierës së tij po i vjen fundi. Ai e konsideron veten “plak”, ndërkohë që synon të rikthehet në ring në pranverën e vitit të ardhshëm. Joshua nuk duelon që prej gushtit të këtij viti, kur humbi revanshin ndaj Usyk.
Britaniku u shpreh se i duhet të punojë shumë për t’i bërë vitet e fundit të karrierës së tij të këndshme dhe të suksesshme. Gjithsesi, ai pranon se mezi pret të dalë në pension dhe të ndërtojë një familje.
“Jam i hutuar, jam si një plak që i ka kaluar koha në ring. Unë e shoh veten se nuk jam as në fillim e as në mes të karrierës time, por në fundin e saj”, ka thënë Joshua.
“Koha ka kaluar shpejt dhe dua të sigurohem që në fundin e karrierës time të arrij ato gjëra që nuk kam pasur mundësi t’i arrij më parë. Mendoj se arritja ime më e madhe s’ka ardhur ende. Mendoj se kur të tërhiqem do të qaj, pasi i kam dhënë shumë këtij sporti, kam sakrifikuar shumë”, u shpreh Joshua
“Të gjithë ne kemi ditët e këqija, por gjithmonë jam përpjekur të jem i fortë. Mezi po pres të rikthehem në ring më i fortë”, ka shtuar Joshua që pret ta mësojë emrin e rivalit të tij, që mund të jetë Deontay Wilder ose Dillian Whyte.a