Partitë opozitare kanë mendime të ndryshme sa i përket ndryshimeve në Eulex, ndër të tjera përfshihet edhe emri i misionit. Deputeti i LDK-së Arben Gashi thotë se lëvizjet duhet të bëhen në konsultim me BE-në e jo siç ka vepruar deri tani qeveria me strategjinë për përfundimin e misionit të EULEX-it dhe projektligjin për përfundim të mandatit.
“Qeveria e Kosovës ka marrë vendim dhe ka propozuar ligj në kuvend për përfundimin e mandatit të EULEX-it gjithashtu ka pruar një strategji të njëanshme për përfundimin e punës së EULEX-it dhe kjo strategji e ky projektligj janë në Komisionin për Legjislacion qe disa muaj sepse edhe une personalisht nuk besoj që kjo duhet të ndodhë kështu por në koordinim të plotë me BE-në”, tha Gashi për KTV.
Ndërsa Glauk Konjufca, deputet i Lëvizjes Vetëvendosje thotë se EULEX-i me qëndrimin e vet në Kosovë më shumë ka bërë politikë se sa ka vënë drejtësi. Konjufaca thotë se rezultatet e misionit evropian ne luftimin e korrupsionit janë të barabata me zero.
“EULEX-i as që do të duhej të kishte ardhur në Republikën e Kosovës dhe ne nuk e pranojmë poashtu idenë që në Kosovë duhet të qëndrojnë sepse Kosova nuk qenka e gatshme të mirret me krimet e luftës, atëherë pse qenkan serbët më të gatshëm se ne të merren me krimet e tyre të luftës, pse qenka Serbia më e pjekur se ne që të merret me krimet e veta të luftës”, tha ai.