Partia Demokratike e Kosovës e ka çuar në Gjykatën Kushtetuese vendimin e kryetarit të Kuvendit të Kosovës për caktimin e seancës plenare të javës së kaluar. Një gjë të tillë e ka bërë të ditur shefi i Grupit Parlamentar i këtij subjekti politik, Abelard Tahiri në një postim në Facebook.
“Si palë e autorizuar pranë Gjykatës Kushtetuese të Republikës së Kosovës, kemi parashtruar kërkesën për vlerësimin e kushtetutshmërisë së Vendimit për caktimin e Seancës Plenare të datës 13 korrik 2023 të Kryetarit të Kuvendit të Republikës së Kosovës, me kërkesën që i njëjti në tërësi të anulohet”, ka shkruar Tahiri.
Sipas tij, seanca e fundit plenare e Kuvendit, ishte caktuar dhe ftuar në kundërshtim me Kushtetutën e Republikës së Kosovës dhe Rregulloren e Punës së Kuvendit, prandaj si e tillë, duhet të anulohet dhe bashkë më të, edhe të gjitha vendimet që janë marrë në këtë seancë jokushtetuese.
“Si parashtrues të këtij rasti, vlerësojmë se, kryetari i Kuvendit, ka bërë shkelje kushtetuese në dy drejtime: e para, në mospërmbushjen e afatit për thirrjen dhe caktimin e seancës plenare dhe, e dyta, duke mos e vendosur për miratim rendin e ditës të kësaj seance – në mungesë të konsensusit të Kryesisë si rezultat i mungesës së kuorumit të nevojshëm, përkatësisht dështimit të mbajtjes së mbledhjes së Kryesisë. Si i tillë, ky vendim ka prodhuar pasoja kushtetuese dhe ligjore sepse ka rezultuar me mbajtjen e seancës plenare të ftuar sipas një procedure jokushtetuese, në të cilën janë miratuar ligje dhe projektligje si dhe vendime të tjera për zgjedhjen/shkarkimin e bartësve të institucioneve kushtetuese dhe institucioneve të pavarura”, ka shtuar tutje shefi i GP të PDK-së.
Krahas kërkesës për anulimin e kësaj seance dhe vendimeve që janë marrë në të, ai ka bërë të ditur se Grupi Parlamentar i PDK-së ka kërkuar edhe Masë të Përkohshme, që deri në vendimin përfundimtar të Gjykatës Kushtetuese, të pezullohet efekti i të gjitha vendimeve që kanë rezultuar nga kjo seancë.
Kujtojmë se në seancën e 13 korrikut, pas përleshjes në mes të ligjvënësve opozitar dhe ministrave të Qeverisë, Kuvendi i Kosovës ka miratuar në lexim të dytë Projektligjin për Institutin e krimeve të kryera gjatë luftës në Kosovë, si dhe Projektligjin për ndryshimin dhe plotësimin e ligjeve që përcaktojnë shumën e beneficionit në lartësi të pagës minimale.
Pikërisht ishte paga minimale që nxiti edhe reagimet e veteranëve të luftës të cilët nuk u përfshinë në këtë Projektligj.