Presidenti ukrainas, Volodymyr Zelensky, pritet të vizitojë Washingtonin javën e ardhshme për të takuar presidentin amerikan, Joe Biden, në Shtëpinë e Bardhë dhe për të zhvilluar takime në Capitol Hill.
Kjo gjatë udhëtimit të tij në SHBA për Asamblenë e Përgjithshme të OKB-së.
Vizita e tij vjen në një moment, kur Kongresi aktualisht po peshon kërkesën e Presidentit Biden për të miratuar më shumë se 20 miliardë dollarë ndihmë shtesë për Ukrainën.
Biden është zotuar të mbështesë Ukrainën “për aq kohë sa duhet”.
Por ndërsa lufta zvarritet, ka përçarje në rritje, veçanërisht midis republikanëve të Dhomës së Përfaqësuesve, rreth asaj se sa ndihmë duhet të vazhdojnë SHBA-të t’i japin Kievit.
Udhëtimi i tij në New York për Asamblenë e Përgjithshme të OKB-së ishte tashmë i njohur, por ndalesat e tij në Washington nuk janë shpallur publikisht.
Udhëtimi në Washington u raportua për herë të parë nga “Punchbowl News”.