Ambasadori i Shteteve të Bashkuara në Kosovë, Jeff Hovenier, në një intervistë për mediumin anglez BBC ka thënë se prapa sulmeve terroriste ndaj Kosovës qëndrojnë një lloj strukture apo disa strukturash.
Ai është pyetur nga BBC nëse Serbia është autori i këtij krimi, ndërkaq Hovenier tha se armët të cilat janë gjetur në Banjskë të Zveçanit janë tregues se “sulmuesit serbë etnikë nuk i siguruan ato vetë”.
Ndër të tjera ai përmendi edhe ish-nënkryetarin e Listës Serbe, Millan Radoiçiqin, i cili pranoi se kishte qenë në organizim të këtij sulmi, meqë rast edhe dha dorëheqje nga kjo pozitë politike.
“Tani, po ashtu, ne e dimë se një individ i cili ishte nënkryetar i njërës nga partitë serbe në Kosovë, për të cilin dihet se ka marrë pjesë në ngjarje me zyrtarë të lartë serbë, njoftoi përmes avokatit të vet se ai ishte organizator i kësaj ngjarjeje dhe se ai ishte i pranishëm. Pra, ne ende po punojmë për ta gjetur se kush ishte saktësisht përgjegjës. Por, tani dimë më shumë rreth kësaj dhe jemi të shqetësuar për atë që ndodhi”, tha Hovenier.