Sot, në sallën e Kuvendit të Komunës së Dragashit, u mbajt Akademia soleme me rastin e 28 Shtatorit – Ditës Ndërkombëtare të Boshnjakëve, organizuar nga Bashkësia e Boshnjakëve të Kosovës. Në këtë Akademi morën pjesë kryetari i Komunës, Bexhet Xheladini, dhe drejtori për Ekonomi, Financa dhe Zhvillim, Qamil Kolloni, përcjell PrizrenPress.
Në fjalën e tij përshëndetëse, kryetari Xheladini tha: “Boshnjakët e Komunës së Dragashit në të gjitha periudhat historike, pavarësisht rrethanave të krijuara, kanë arritur që ta ruajnë identitetin, gjuhën, traditat, kulturën dhe përkatësinë fetare, andaj është nder dhe krenari të jesh pjesëtar i një komuniteti siç janë boshnjakët.”
Ai gjithashtu theksoi rëndësinë e bashkëjetesës dhe tolerancës ndëretnike. “Bashkëjetesa, harmonia dhe toleranca ndëretnike janë themelet e një shoqërie përparimtare dhe demokratike, duke theksuar se do të punojmë fuqishëm që t’i ruajmë me fanatizëm këto vlera për të cilat Komuna jonë është shembull pozitiv”.
Pas përfundimit të Akademisë, kryetari Xheladini priti në zyrën e tij përfaqësues të komunitetit boshnjak dhe vizitoi zyrën e Partisë VATAN./PrizrenPress.com/
