Për shkak të rrëshqitjes së dheut është mbyllur përkohësisht autostrada “Ibrahim Rugova”, në segmentin e 27-të, në mes të Prizrenit dhe Suharekës, ka njoftuar Ministria e Infrastrukturës.
Deri në pastrimin e dheut dhe lirimin për qarkullim të këtij segmenti është kërkuar që pjesëmarrësit të shfrytëzojnë rrugët alternative.
“Me qëllim të lëvizjes së sigurt të qytetarëve në këtë segment kjo pjesë është bllokuar për qarkullimin e automjeteve deri në pastrimin e dheut të shembur. Ekipet tona të mirëmbajtjes janë në vendin e ngjarjes duke ndërmarrë hapat konkret për lirimin e kësaj pjese të Autostradës në fjalë”, thuhet në njoftimin e MI-së.
Për këto arsye nga pjesëmarrësit në trafik është kërkuar që të shfrytëzohen rrugët alternative.
“Lusim të gjithë qytetarët e vendit tonë, që deri në pastrimin e dheut dhe lirimin për qarkullim të këtij segmenti të shfrytëzojnë rrugët alternative. Lidhur me pastrimin e dheut nga autostrada do ju njoftojmë me kohë”, përfundon komunikata e Ministrisë së Infrastrukturës.
