Çmimet në lokalet e ‘Shatërvanit’ në Prizren kanë pësuar një rritje ndjeshme, duke shkaktuar shqetësim te qytetarët dhe vizitorët.
Oda e Ndërmarrësve dhe Zejtarëve në këtë qytet ka reaguar ndaj kësaj rritjeje, duke kërkuar që bizneset të mos keqpërdorin fluksin e madh të vizitorëve për të ngritur çmimet në mënyrë të paarsyeshme.
“Bizneset të mos keqpërdorin fluksin e madh të vizitorëve në rritjen e çmimeve të paarsyeshme, por të ruajnë cilësinë dhe të rrisin numrin e vizitorëve, në mënyrë që qyteti i Prizrenit të jetë shembull për shumë qytete të tjera, duke ruajtur traditën”, thuhet në reagim të Odës.
“Qeveria lokale ka bërë investime të konsiderueshme në infrastrukturën e Shatërvanit, duke përmirësuar ambientin për bizneset dhe vizitorët. Bizneseve u është mundësuar hapësira për tavolina, karrige dhe ndriçim me çmime të arsyeshme, me qëllimin që të kenë përfitime pa dëmtuar përvojën e qytetarëve. Megjithatë, rritja e çmimeve mund të ndikojë negativisht në imazhin e qytetit dhe mund të ulë numrin e turistëve”.
Nëse bizneset nuk reflektojnë pozitivisht në formimin e çmimeve, Oda e Ndërmarrësve dhe Zejtarëve ka paralajmëruar se mund të kërkojë nga komuna që të rishikojë kontratat e lejeve për hapësira publike dhe t’i kthejë ato qytetarëve.
“Shpresojmë që bizneset do të reflektojnë pozitivisht në formimin e çmimeve, në të kundërtën do të kërkojmë nga komuna të rishikojë kontratat e dhënies së lejeve në këto hapësira dhe t’i kthejë ato qytetarëve”.
Për këtë arsye, Oda ka kërkuar një takim mes bizneseve dhe komunës për të diskutuar shqetësimin e qytetarëve dhe për të gjetur një zgjidhje të qëndrueshme.
“Kërkojmë që bizneset dhe komuna të kenë një takim diskutimi rreth këtij shqetësimi të qytetarëve”.
“Investimet e komunës në ‘Shatërvan’ kanë ndihmuar në krijimin e një pamjeje më atraktive për qytetarët dhe turistët, duke rritur edhe qarkullimin e bizneseve lokale. Kjo është arritur falë përpjekjeve për të bërë Prizrenin një destinacion më tërheqës, por ruajtja e balancës mes përfitimit dhe mirëqenies së qytetarëve mbetet një sfidë kryesore”./PrizrenPress.com/
