Kryeministri i Kosovës, Hashim Thaçi, është zotuar se Qeveria, përmes Projektligjit për veteranët e UÇK-së, do t’i merr parasysh të gjithë qytetarët dhe ushtarët që kanë kontribuuar qoftë edhe një orë në luftën e Kosovës. Sot, gjatë mbledhjes së Qeverisë ai ka thënë se ky Projektligj, i cili gjatë kësaj jave do të procedohet në Kuvend, ka për qëllim përcaktimin e benificioneve për veteranët e UÇK-së.
“Realizimi i të drejtave me benificione të përcaktuara me këtë ligj bëhet për shkak të nderit dhe respektit që gëzojnë në popullin e Kosovës dhe më gjerë… Ky projektligj përfshin të drejtat dhe benificionet për të gjithë ushtarët e UÇK-së, ushtarët e Kosovës në të gjitha periudhat që nga fillimi i rezistencës së armatosur deri në çlirimin definitiv të Kosovës”, ka thënë ai në mbledhjen e ekzekutivit, transmeton Koha.
Më tej, kryeministri ka bërë të ditur të gjitha beneficionet që do të dalin nga ky ligj.
Ndërkohë, Qeveria i dha mbështetje të plotë agjendës për shënimin e përvjetorit të gjashtë të shpalljes së pavarësisë së Kosovës, të cilën e prezantoi ministri i Forcës së Sigurisë së Kosovës, Agim Çeku, i cili është edhe kryetar i Këshillit Organizativ për shënimin e kësaj date.
Çeku prezantoi edhe logon e 6 vjetorit të pavarësisë, që simbolizon rrumbullakimin e shtetësisë dhe vazhdimin drejt Bashkimit Evropian.