Kombëtarja e Kosovës nuk ka arritur të marrë rezultat pozitiv në ndeshjen e parë të kualifikimeve për Kampionatin Botëror 2026. Dardanët u mposhtën nga Zvicra me rezultat 4:0 në ndeshjen e zhvilluar të premten mbrëma në stadiumin “St. Jakob Park” të Basel-it.
Takimi nisi me entuziazëm të madh nga futbollistët dhe tifozët tanë, të cilët kishin mbushur gjysmën e stadiumit, duke i dhënë ngjyrë dhe atmosferë të veçantë kësaj sfide. Megjithatë, në fushë epërsia ishte në anën e vendasve. Zvicra, e udhëhequr nga kapiteni Granit Xhaka, shfaqi nivel të lartë loje dhe shfrytëzoi në maksimum çdo hapësirë në mbrojtjen tonë.
Seria e golave nisi në minutën e 22-të, kur Manuel Akanji shënoi me kokë pas një goditjeje nga këndi. Vetëm tre minuta më pas, Breel Embolo dyfishoi epërsinë, ndërsa Silvan Widmer realizoi golin e tretë në minutën e 39-të. Embolo sërish u gjend në qendër të vëmendjes duke shënuar golin e katërt në fund të pjesës së parë (45’), duke e mbyllur ndeshjen praktikisht pas 45 minutave.
Në pjesën e dytë, përzgjedhësi Franco Foda bëri disa ndryshime në përbërje, ndërsa Kosova u tregua më aktive, por pa arritur të krijojë raste konkrete për gol. Zvicra uli ritmin dhe menaxhoi rezultatin, duke ruajtur avantazhin e lartë deri në fund.
Në këtë ndeshje debutoi edhe mesfushori Leon Avdullahu, i cili iu bashkua Dardanëve ditë më parë.
Pas kësaj humbjeje, Kosova do të kërkojë reagim të hënën, kur në stadiumin “Fadil Vokrri” në Prishtinë pret Suedinë, në ndeshjen e dytë të kësaj fushate kualifikuese.
Marketing
Banesat më të kërkuara në Prizren – Bëhu pronar në Foleja Residence!
Kompleksi ‘Newco Elan’ ofron banesa të ëndrrave tuaja në zemër të Prizrenit
‘Toni Residence’ – Mos e humb rastin për të blerë banesën tënde në Prizren
Hapësira me qira në objektet e reja te ‘RENELUAL TAHIRI’ në Prizren