Inva Mula, sopranoja e famshme shqiptare në një mësazh të postuar në Facebook e cilëson këngëtaren Vaçe Zela një “Divë absolute”.
Me një mesazh krejt tjetër, sikur bisedon lirshëm me të, Inva pranon që Vaçja ka qënë modeli i saj.
“E dashur Vaçe!
Po të drejtohem duke ngritur sytë nga qielli me bindjen se më dëgjon! Ti u ktheve në një legjendë që në vitet e rinisë tënde, ishe simboli i artistes absolute, pa konkurrencë, pa krahasim! Atje ku tingellonte zëri yt dhe gërshetohej me fjalën aq bukur, shqiptuar me një frazë melodike që vetëm ti dije ta skalisje, lije vetëm një rrugë të ndriçuar, e cila u bë referencë e këngës shqipe!
Kam patur fat të të njoh që kur isha fare e vogel dhe dëgjoja në cep të dhomës krijimet e babait tim për ty! Ti ishe modeli im, ishe ëndrra ime dhe kështu vazhdoje të ishe gjithë jetën dhe për shumë artiste të tjerë! Të falenderoj dhe do të jem mirënjohese Diva jonë Absolute!”, përfundon mesazhi i saj i ndjerë.