Antoneta Papapavli aktorja e dashur e kinemasë dhe teatrit sot do të mbushte 76 vjeç, Sëmundja nga e cila vuajti prej vitesh qe i mori jetën disa muaj më parë , nuk mundi t’i zbehë imazhin e një artisteje mjaft të dashur për publikun.
Ndër rolet ku ajo spikati gjatë karrierës 20 vjeçare, renditen Ngjela tek “Komisari i Dritës”, Hatixheja tek “Tinguj Lufte , gruaja labe tek “Ata ishin kater”, mamaja e Asimese tek “Pertej mureve të gurta”, Lefka tek një “Shoqe nga fshati”.
Me imazhin e saj mjaft tërheqës dhe paraqitjen e kuruar, Papapavli mbahet mend për rolin e drejtoreshës tek filmi aq i dashur për fëmijë, “Shoku ynë Tili”, mamaja e Margarites tek “Dora e ngrohtë” dhe mësuesja e pianos tek filmi “Apasionata”.
Në teatër spikati në dhjetëra role si Olimbia tek “Karnavalet e Korçës”, Drita te “Drita”, Mara te “Toka jonë”, Deizi tek “Arturo Ui”, Ledi Milford tek “Intrigë dhe dashuri”, Adela te “Shkëlqimi dhe rënia e shokut Zylo”, gjyshja te “Hijet e natës”, personazhi kryesor tek “Cuca e maleve”, etj.
Adhuruesit e kinemasë e kujtojnë atë me batutën e famshme”Thesin Aga!” në filmin “Përballimi”. Për aktivitetin e saj artistik është nderuar me titullin “Artiste e Merituar”, me Urdhrin “Naim Frashëri” Klasi I dhe dekorata të ndryshme./ATSH