Gjithçka do të fillonte nga një shëtitje buzë lumit Klina. Duke ecur në një ditë shkurti të vitit 1998, piktori Idriz Berisha (61) nga Ujmiri i Klinës, do të haste në një kapelë që në shikim të parë nuk dukej e tillë. Lumi e kishte nxjerrë në breg.
“Ishte krejt me baltë”, tregon Berisha për Kohën Ditore. E kishte marrë në shtëpinë e tij. Kureshtja do ta bënte atë që ta pastronte kapelën që ishte jo e zakontë, sepse ngjante në helmetë ushtarake, por nuk ishte e tillë. Berisha thotë se i kishte shkuar mendja që t’i përdorte shkathtësitë artistike në këtë rast.
“Thash me vete pse nuk e shndërroj në helmetë ushtarake edhe ashtu ushtarët e UÇK-së, kishin nevojë për të tilla”, rrëfen ai. Brenda ditës helmetës ia “veshi” uniformën e kamufluar. Pa pasur asnjë skicë, në ballë të saj do të “qëndiste” me brushë emblemën e UÇK-së.
“Edhe me pas modele plus shabllone është problem të punohet një helmetë e tillë po vullneti po të futke në çdo punë”, tregon piktori i diplomuar në Akademinë e Arteve në Prishtinë, në vitet ’70.