Në Universitetin e Prizrenit “Ukshin Hoti”, nën organizimin e organizatës studentore USPE, të mërkurën është mbajtur Tribunë në kujtim të Demonstratave Studentore të 11-26 mars 1981. Në këtë tribunë një fjalë rasti e mbajti edhe Prof. Dr. Zahadin Shemsidini, u. d. rektor i UPZ-së. Ai theksoi se këto demonstrata ishin vazhdimësi e përpjekjeve të popullit shqiptar për liri e pavarësi dhe se falë këtij kontributi e sakrifice u bë i mundur fillimi i luftës së armatosur dhe çlirimi i vendit dy dekada më pas. “Ne u jemi mirënjohës të gjithë atyre që u sakrifikuan për lirinë dhe pavarësinë që ne e gëzojmë sot. Brezat e rinj, po ashtu dhe ju studentë të dashur nuk duhet ta harroni këtë sakrificë, por vazhdimisht ta përkujtoni sepse është frymëzim për punën e mëtutjeshme”, theksoi Shemsidini. Ai shtoi se krahas shumë të tjerëve, ishte edhe intelektuali e politologu i shquar profesor Ukshin Hoti, i cili doli në mbështetje të hapur të kërkesës së studentëve për Republikë, emrin e të cilit tani e mbanë me krenari Universiteti i Prizrenit.
Prof. Dr. Mejdi Elezi, historian, theksoi se historikisht shumë shkencëtar kanë pasur të drejtë, që është vërtetuar me rastin e Kosovës, se universiteti i vënë themelet e shtetit. “Kjo është dëshmi e gjallë që ka ndodhur në Kosovë”, theksoi ai. Profesor Elezi tha se në kohën e protestave të vitit 1981 ka qenë profesor në Shkollën e Lartë Pedagogjike “Bajram Curri” në Gjakovë. Ai kujtoi se si mediat RTP, Rilindja dhe të gjitha revistat u munduan t’i japin karakter social, dhe jo politik këtyre kërkesave, mirëpo më vonë filluan të zhvishen dhe të dalin kërkesat reale të studentëve. “Kërkesë shumë reale ishte që 2 milion shqiptar të Kosovës të kenë republikën ashtu si edhe shtetet fqinje. Mirëpo, jo që nuk na dhanë por qeveria jugosllave e eliminoi edhe Kushtetutën e vitit 1974, dhe kjo solli akoma urrejtje te populli shqiptar. Kërkesat e demonstratave të vitit 1981 kanë qenë shumë reale, por më vonë bënë jo-reale, sepse erdhi deri te shthurja e Jugosllavisë, dhe kërkesa doli për krijimin e shtetit të pavarur të Kosovës e cila dha shumë viktima por u kurorëzua me sukses”, theksoi Elezi.
Një fjalë rasti në këtë tribunë e mbajti edhe Dekani i Fakultetit Juridik, Prof. Dr. Arif Riza. Ai evokoi kujtimet personale kur kishte qenë nxënës në atë kohë. Ai kujtoi se si i kishin vendosur plisat në përkrahje të protestave dhe për këtë arsye i kishte arrestuar policia serbo-jugosllave. Riza bërë të ditur se si nxënës e kishin shkruar në vende të ndryshme fjalën “Kosova Republikë”, që ishte një kërkesë edhe e demonstratave të kohës.
Edhe profesori Naim Baftiu e mbajti një fjalë rasti, ku theksoi se lirinë që e gëzojmë sot është si rrjedhojë e punës së asaj gjenerate.
Arlind Rifaj, anëtar i Parlamentit Studentor dhe organizator i kësaj tribune nga USPE, theksoi domosdoshmërinë e kujtimit të këtyre ngjarjeve të mëdha që të shërbejnë si frymëzim për të ardhmen. Në fund u shfaq një film dokumentar për këto ngjarje historike, i cili u ndjek nga të pranishmit.