Prej 15 qershorit, shefi i Prokurorisë Speciale të Republikës së Kosovës Jonathan Ratel, do të jetë shef në shkuarje i organit që ka përgjegjësinë kryesore të luftimit të krimeve serioze në vend. Në panelet e gjykatave, që nga mesi i qershorit nuk do të jenë më dy gjyqtarë të EULEX-it dhe një gjyqtar vendës. Përbërja do të ndryshojë në favor të kosovarëve, duke bërë që panelet të përbëhen nga dy gjyqtarë vendës dhe një ndërkombëtar.
Këto janë ta arriturat e vetme të palës kosovare në dialogun me BE-në për heqjen e mandatit ekzekutiv të EULEX-it. Prokurorët ndërkombëtarë do të vazhdojnë të kenë mandat ekzekutiv, por për të marrë një rast të ri do t’u duhet besimi i shefit të tyre kosovar. Të gjitha ndryshimet tjera të planifikuara për misionin më të madh që ka pasur BE-ja ndonjëherë në një vend jashtë unionit, kanë dalë të jenë të pamundshme.
EULEX-i do të vazhdojë të jetë mision i madh edhe pas qershorit, pasi që reduktimi do të jetë minor, derisa nuk do të ndahet në tri njësi, ashtu siç qe planifikuar nga vetë ekspertët e BE-së që patën bërë një rishikim strategjik të misionit në fund të vitit të kaluar. Strategjia, të cilën përfaqësuesja e lartë e BE-së Catherine Ashton ua pati prezantuar shteteve anëtare dhe një kopje të së cilës pati arritur të publikoj gazeta Tribuna, planifikonte që EULEX-i të mos ishte më një mision i vetëm dhe që të ndahej në tri njësi./tribuna/