Shumë shpejtë do të fillohet me spërkatjen e hapësirave të gjelbra në Komunën e Malishevës, thotë kryetari i kësaj komune, Ragip Begaj, duke bërë thirrje qytetarëve që të jenë të kujdesshëm.
“Është një çështje që nëse jemi të kujdesshëm nuk do të kemi pasoja, kryesorja është që çdo qytetarë i Malishevës me kontrollua vetën, fëmijët e tyre, dhe se Qendra e Mjekësisë Familjare të Malishevës është e gatshme të ju ofrojë ndihmën”, shprehet Begaj.
Në një intervistë për RTK 1, ai ka folur për sfidat dhe zhvillimet e deri tanishme në Malishevë që nga marrja e mandatit për të udhëhequr me këtë komunë, duke thënë se ka trend të rritjes të hyrave në Komunë.
Begaj përmendi edhe investime në 20 fshatra për instalim të rrjetit të kanalizimit dhe ujësjellësit, trotuaret, rrugët, investime në bujqësi, mbështetje të sporteve të ndryshme.
Brenga e tij më e madhe mbetet papunësia, dhe tregon që brenda ditës deri në 50 qytetarë e vizitojnë në zyrë për këtë problem, prandaj si prioritet thotë se do të jenë investimet në bujqësi.