Banorët e Prevallës, të cilët thonë se janë banorë autoktonë, janë revoltuar me vendimin e Ministrisë së Mjedisit për rrënimin e të gjitha shtëpive të ndërtuara pas vitit 1986 kur kjo pjesë është shpallur park nacional.
Banorët thonë se shtëpitë e reja të ndërtuara pas luftës janë ndërtuar në themelet e shtëpive të vjetra të ndërtuara në vitet e 40-ta gjë që sipas tyre është duke u bërë e padrejtë.
“Na jemi banorë të përhershëm sjemi që kemi ardh dje jemi me shekuj ne sot e kemi ndreq shtëpine e aty ku na kanë lanë gjyshërit, 47 e ka ba gjyshi jem unë në të njëjtin temel e kam bërë para 10 vjetëve”, thotë
Allmir Bajrami banorë.
Mos të na trajtojnë neve si kta tjertë që vijnë për vikende këtu, na jemi me shekuj këtu gjysh e stërgjysh kanë jetu këtu, na kemi dhi e lopë e mos të na trajtojnë njëjtë ky është problemi, thotë ai.
Ministri i Mjedisit dhe Planifikimit Hapësinor, Dardan Gashi, thotë se ekspertët janë duke bërë verifikimin e të gjitha shtëpive, duke shtuar se do të rrënohen të gjitha shtëpitë e reja. “Ata pretendojnë ashtu por është çështje e ekspertëve kjo, parimisht është kështu shtëpitë që janë ndërtu para 1986 nuk rrënohen shtëpitë që janë ndëtu pa leje pas parkut nacional do të rrënohen kështu e thotë ligji ne e kemi zbatu ligjin dhe do ta zbatojmë”.
Sa u përket lejeve të shtëpive ministri Gashi thotë se janë të vetëdijshëm se shtëpitë e ndërtuara para parkut nacional nuk ekzistojnë lejet e tyre por shton se të dhënat janë të ruajtura në kadastër gjë që dëshmon se kur janë ndërtuar.