Qeveria duhet të sjellë në Kuvend një projektligj i cili ofron ndihmën juridike për personat të cilët do të jenë të akuzuar nga Gjykata Speciale.
Deputeti i PDK-së, Arsim Bajrami, pas vendimit të Kuvendit të Kosovës për themelimin e Gjykatës Speciale për krime lufte, ka thënë se Qeveria duhet t’iu ofrojë ndihmë shtetërore të gjithë atyre individëve të cilët do të përballen me këtë gjykatë – shkruan Epoka e re.
Ai ka thënë se shteti e ka obligim të ofrojë ndihmë në mënyrë që të argumentohet se lufta e UÇK-së ka qenë e pastër dhe e drejtë.
“Qeveria duhet të sjellë në Kuvend një projektligj i cili ofron ndihmën juridike për personat të cilët do të jenë të akuzuar pranë kësaj gjykate. Edhe shtetet e tjera në rajon kanë krijuar fonde shtetërore publike për t’u dhënë ndihmë këtyre personave. Pra, për t’u ofruar mbrojtje me të cilën argumentohet pafajësia e tyre, sepse nuk është çështje krejt individuale, por çështje e kredibilitetit shtetëror dhe kredibilitetit të drejtë të luftës së UÇK-së”, ka thënë Bajrami.