Kryetari i Malishevës, Ragip Begaj ka reaguar rreth lakimit të emrit të tij, në rastin e arrestimit të Blerim Begajt e Bali Krasniqit.
“Lidhur me shkrimin me titull: *Malishevë: Arrestohen Blerim Begaj e Bali Krasniqi, dyshohen për korrupsion*, përmendet emri i kryetarit të Komunës së Malishevës, Ragip Begaj, ku thuhet se personi i arrestuar Blerim Begaj, është kushëri i afërt i kryetarit Ragip Begaj, sqarojmë opinionin se kjo është një e pavërtetë e madhe”.
“Drejtori i QPS-së në Malishevë, përveç mbiemrit Begaj dhe që është nga fshati Banjë, nuk e lidh asgjë me kryetarin e Komunës së Malishevës Ragip Begaj”
“Kryetari Begaj dhe drejtori i QPS, as nuk janë nga e njëjta lagje dhe as nuk kanë asnjë lidhje gjaku, dhe kjo është e vërteta”.
“Po ashtu, sqarojmë opinionin se kryetari Begaj, është i përkushtuar në luftimin e korrupsionit në çfarëdo forme dhe kushdo që bie ndesh me ligjin, duhet të përballet me drejtësinë”.
“Kryetari Begaj dhe qeveria komunale e Malishevës, kërkon që të gjithë ata që shkelin ligjin, jo vetëm me korrupsion, të përballen me drejtësinë dhe drejtësia të vjen në vend për të gjithë njësoj, përfshirë të gjithë zyrtarët komunalë”.
“Kryetari Begaj, është i përkushtuar në zbatimin e ligjit dhe të gjithë ata që shkelin ligjin,duhet të përballen me drejtësinë’ thuhet në fund të reagimit të Zyrës për medie të kryetarit të komunës së Malishevës Ragip Begajt.