Kryetarja e KQZ’së Valdete Daka thotë se nëse shpallen zgjedhjet e përgjithshme për 8 qershor dhe Kuvendi shpërndahet më 5 maj, do të jetë kohë e shkurtër për organizimin e zgjedhjeve nga ana e Komisionit Qendror Zgjedhor.Ajo tha se afati prej rreth 32 ditësh për KQZ’në do të ishte kohë e shkurtër dhe sfiduese.
Daka thotë se sfidë është edhe organizimi i zgjedhjeve në veriun e vendit, pasi në zgjedhjet loklale në atë pjesë u deshën përgatitje tre muajshe.“Po vetë fakti se janë afate jashtëzakonisht të shkurtra është sfiduese”, tha Daka në një intervistë për RTV 21.
Por, Daka tha se nëse zgjedhjet shpallen nga presidentja, KQZ’së nuk do t’i mbetet tjetër vetëm që të kryej detyrën e saj.
“Ne e dimë se do të mundemi, natyrisht se gjithmonë sa më shkurt që është koha për organizim të zgjedhjeve të gjitha punët janë më të ngjeshura dhe mund të bëhet ndonjë lëshim teknik”, tha Daka.
Data 8 qershor është propozuar nga kryeministri Hashim Thaçi i cili sot për këtë çështje ka biseduar me presidenten Atifete Jahjaga.