Nisma e Rinisë për Kosovën sot ka mbajtur një takim pune me të gjitha kryesitë e NISMËS së Rinisë për Kosovën të të gjitha komunave. Ky ishte një takim pune, që në përmbajtje të tij kishte informimin rreth ecurisë së NISMËS për Kosovën në gjithë vendin, dhe mobilizimin e mëtutjeshëm dhe aktivizimin sa më të madh të të rinjve të NISMËS për zgjedhjet e qershorit.
Kryetari i NISMËS për Kosovën, Fatmir Limaj, ka falënderuar të rinjtë e NISMËS që sipas tij, me vullnet dhe sinqeritet të plotë po angazhohen çdo ditë e më shumë për ta ndalur këtë gjendje të keqe në Kosovë.
“Me shpresë që shumë shpejt me anë të vizionit të NISMËS për Kosovën të fillojmë që së bashku të punohet ndershëm për Kosovën. Ju rinia jeni intelektualët, jeni ju ata qytetarët, që e keni përgjegjësinë kryesore për ndërtimin e shtetit të Kosovës”, është shprehur Limaj.
Ndërkaq, kryetari i NISMËS së Rinisë për Kosovën, Kreshnik Cukaj, ka thënë se, si të rinj po kalojnë ditët më të vështira të vendit tonë. “Andaj prezenca juaj këtu tregon se me tepër se çdo kush, jemi ne të rinjtë e NISMËS për Kosovën, që mundemi dhe sigurisht do t’i themi jo kësaj qeverisje aktuale, e cila që një kohë të gjatë është duke e shkatërruar rininë me anë të politikave përjashtuese”, ka thënë Cukaj.