Artisti ka thënë për BBC se me anë të këtij portreti ai ka synuar të paraqesë dikotominë e jashtëzakonshme të dikujt me fuqi dhe urtësi të madhe, që në të njëjtën kohë është shumë e re.
Një pikturë e nxënëses nga Pakistani që u qëllua në kokë, Malala Yousafzai, është shitur për 82 mijë dollarë në një ankand të Nju Jorkut.
16 vjeçarja u qëllua në kokë në vitin 2012 nga talebanët, për shkak se lobonte për edukimin e vajzave në Pakistan. Portretin e saj e ka punuar artisti britanik Jonathan Yeo, vitin e kaluar në Londër.
Artisti ka thënë për BBC se me anë të këtij portreti ai ka synuar të paraqesë dikotominë e jashtëzakonshme të dikujt me fuqi dhe urtësi të madhe, që në të njëjtën kohë është shumë e re.
“Instinkti i saj nuk është keqardhja për veten, por se çfarë mund të bëj ajo për t’i ndihmuar vajzat e tjera që janë në pozitën e saj”, ka thënë Yeo.
Fondacioni Malala, i cili është përfitues direkt i këtyre të hollave, ka thënë se do t’i dhurojë ato për organizatat nigeriane të cilat janë të përqendruara në edukimin e vajzave dhe grave, tani që Nigeria po kalon kohë të vështira, si rezultat i kidnapimit të mbi 250 vajzave nga grupi militant, Boko Haram.