Për të shmangur bojkotin dhe për të siguruar pjesëmarrjen e komunitetit serb në zgjedhjet e 8 qershorit, ambasadori i OSBE-së, Jean-Claude Schlumberger, ka thënë se pret që deri në ditën e zgjedhjeve në kuadër të ligjit të zgjidhen të gjitha çështjet.
Ai ka theksuar rëndësinë e angazhimit konstruktiv dhe njohjes së rrethanave specifike historike në veri të Kosovës.
Në një intervistë për “Kohën Ditore” Schlumberger ka deklaruar se rreth 150 anëtarë nga stafi i OSBE-së do të jenë prezentë në çdo qendër votimi në veri, në ditën e zgjedhjeve.
Sa i përket aspektit të sigurisë, Schlumberger ka potencuar se planifikimi operacional tanimë është diskutuar me Ministrinë e Punëve të Brendshme dhe me Policinë e Kosovës, si reagues primarë të sigurisë, si dhe me EULEX-in e KFOR-in, si reagues të dytë, respektivisht të tretë, transmeton koha.net.
Shumë sy do të drejtohen në Kosovë në “Ditën Z”, kështu që qytetarët dhe subjektet politike duhet të japin kontribut për një përfundim të suksesshëm, ka thënë ambasadori i OSBE-së.