Vëzhguesit evropianë kanë vendosur të monitorojnë gjithë Kosovën gjatë ditës së zgjedhjeve.
Zëdhënësja e monotiruesve të zgjedhjeve të BE’së në Kosovë, Sarah Crozier, ka thënë se vëzhguesit e BE’së do të shpërndahen në 20 komuna ku pastaj do të mbulojnë gjithë Kosovën.
“Gjithë së bashku do të jenë mbi 90 vëzhgues duke përfshirë edhe vëzhguesit e BE’së dhe personalin diplomatik të ambasadave”, ka thënë Crozier, për Express.
Ajo ka treguar se të hënën do të dalin në një konferencë për media për t’i dhënë përfundimet e tyre lidhur me procesin zgjedhor të ditës së diel.
“Ne nuk japim mesazhe për votuesit. Ne vetëm e vëzhgojmë procesin dhe shikojmë a po respektohet ligji gjatë votimit. Të gjitha këto do t’i raportojmë në një konferencë për media e cila do të mbahet të hënën”, ka shtuar ajo.