Arsim Bajrami, njohësi i çështjeve kushtetuese, dhe njëherit kandidat për deputet nga PDK-ja, ka thënë se marrëveshja e arritur në mes partive opoizitare, konkretisht në mes LDK-së, AAK-së dhe Nismës është anti-kushtetuese. Sipas tij Kushtetuta e përcakton që mundësinë për formimin e qeverisë së re e ka vetëm partia që ka dalë e para në zgjedhje parlamentare.
“Është marrëveshje anti-kushtetuese dhe joinstitucionale sepse nuk ka bazë në Kushtetutën e Kosovës,për shkak se neni 95 në mënyrë shumë të qartë e përcakton që mandatin për ta formuar qeverinë e ka partia politike apo koalicioni parazgjedhor që ka shumicën e ulëseve në parlament dhe kjo është shumë e qartë dhe vetëm nëse brenda 15 dite nuk arrihet të formohet qeveria nga mandatari i parë atëherë ka një afat shtesë prej dhjetë ditëve, por përsëri presidentja do ta nominoj kandidatin për kryeministër nga mazhoranca, kështu që kjo marrëveshje është anti-kushtetuese. Sipas nenit 95 pika 4 thotë se kemi procedurë të njëjtë, pra nominohet kandidati i dytë nga mazhoranca”, ka thënë për RTK-në Bajrami.