Sekretari i përgjithshëm i AAK-së, Burim Ramadani, është shprehur i bindur se formimi i qeverisë nga koalicioni paszgjedhor LDK-AAK-NISMA në krye me Ramush Haradinajn është punë e kryer dhe kanë mbetur vetëm procedurat.
Ai ka thënë se formimi i qeverisë nga koalicioni LDK-AAK-NISMA do të bëhet në fazën e dytë, pasi herën e parë Thaçi nuk do të mund ta formojë qeverinë. “Thaçi nuk do të mund të formojë qeverinë për shkak se asnjëra parti shqiptare në Kuvendin e Kosovës nuk pranon të bashkëjetojë me të dhe PDK-në në Qeveri. Pastaj, sipas procedurës, ne do të jemi në gjendje ta bindim presidenten e Kosovës në formë të argumentuar se kemi shumicën e nevojshme në Kuvend për të formuar qeverinë dhe në fazën e dytë, sigurisht se presim që mandatari të jetë z. Haradinaj. Prandaj, edhe një herë po them me bindje të plotë: Qeveria Haradinaj është çështje e kryer, kanë mbetur vetëm procedurat”, ka thënë Ramadani në këtë intervistë për “Epokën e re”.
Ai ka hedhur poshtë mundësinë që AAK-ja t’i bishtnojë marrëveshjes me LDK-në dhe NISMËN për Kosovën. “AAK-ja është parti serioze dhe e përkushtuar në angazhimet e veta politike. Bishtnimet dhe metodat klandestine i takojnë asaj partie që do të mbetet në opozitë”, ka theksuar ai.
Sipas Ramadanit, për jetësimin e qeverisë së drejtuar nga Haradinaj nuk do të jetë problem as posti i kryeparlamentarit i cili, po ashtu, do t’i takojë koalicionit paszgjedhor. “E drejta për ta propozuar kryetarin e Kuvendit i takon grupit më të madh parlamentar. E ne jemi grupi më i madh parlamentar, me 47 deputetë, jo PDK-ja, sepse ajo i ka 37 deputetë”, ka deklaruar Ramadani, duke shtuar se interpretimi i Gjykatës Kushtetuese lidhur me mandatarin e qeverisë ka qenë profesional dhe shtetformues.
Ramadani ka thënë se, pavarësisht faktit se nuk ka arritur të bëhet deputet edhe për një mandat, angazhimi i tij do të jetë edhe më tutje në të mirë të qytetarëve dhe fuqizimit të shtetit të Kosovës.