Një person është vrarë mbrëmë në Rahovec. Zëdhënësi i Policisë së Kosovës në Prizren ,Hazir Berisha tha se vrasja ka ndodhur rreth orës 23:25 minuta.
“Rreth orës 23:25 minuta, policia në Rahavec është informuar se në fshatin Brestovc ka të shtëna me armë zjarri. Pas pranimit të informacionit , një patrullë policore e cila ka qenë më afër lokacionit ka shkuar në vendin e ngjarjes dhe nga disa dëshmitarë ka kuptuar se një person është plagosur me armë zjarri dhe se i njëjti nga familjarë është dërguar në Emergjencën e Spitalit Rajonal në Prizren”.
“ Në vendin e ngjarjes policia kishte vërejtur gjurmë gjaku. Më pas për këqyrjen e vendit të ngjarjes janë thirr eprorët policorë dhe të gjitha njësitë relevante dhe prokurori i shtetit të cilët kanë kryer procedurat hetimore”.
“Pas një hetimi fillestar është kuptuar se në emergjencën e spitalit është dërguar viktima mashkull i vitlindjes 1992 i cili kishte ndërruar jetë në spital”.
“Lidhur me rastin, policia ka arrestuar një të dyshuar të vitlindjes 1968 mirëpo i njëjti nuk është intervistuar ende sepse është nën ndikim të alkoolit”.
“Hetues policorë dhe krim teknikët ende po vazhdojnë me procedimin e vendit të ngjarjes dhe sot është gjetur një armë e llojit pistoletë M 57 e kalibrit 7.62 mm e fshehur në ushqim bagëtish në oborrin e të dyshuarit të arrestuar e cila besohet të jetë përdorë në rast”.
“ Janë gjetur dhe sekuestruar edhe tre karikatorë me 31 fishekë të të njëjtit kalibër. Në cilësi të provës materiale janë sekuestruar edhe dy gëzhoja të fishekëve. Trupi i pa jetë i viktimës është dërguar për autopsi”/PrizrenPress.com/