Islanda e ngriti në nivelin më të lartë paralajmërimin për avionët, pas një shpërthimi të vogël vullkanik që ka shkaktuar shqetësime se hiri në atmosferë mund të krijojë çrregullime në udhëtimet ajrore.
Autoriteti meteorologjik i Islandës tha se një shpërthim është zbuluar nën një akullnajë në vullkanin Bardarbunga, ku këtë javë ka patur një seri tërmetesh, raporton VOA.
Paralajmërimi me “Kodin e kuq” tregon se një shpërthim është i pashmangshëm ose është duke ndodhur. Sipas agjencisë së lajmeve Associated Press, autoritetet e aviacionit kanë shpallur ndalimin e fluturimeve në zonën rreth vullkanit, por nuk e kanë mbyllur hapësirën ajrore islandeze.
Rajoni në Islandën qendrore në afërsi të vullkanit u evakuua këtë javë si masë paraprake.
Kjo ka shkaktuar shqetësime për një përsëritje të çrregullimeve në udhëtimet ajrore, siç ndodhi në vitin 2010, kur gjatë një javë u shtynë ose u anuluan shumë fluturime, për shkak të hirit nga një vullkan në shpërthim.