Presidenti i Këshillit Evropian, Herman Van Rompuy, ka përgëzuar kryeministrin Hashim Thaçi, për punën që ka bërë për arritjen e marrëveshjes për normalizim të marrëdhënieve Kosovë – Serbi. Ai ka thënë se tani duhet të sigurohen për zbatimin e saj.
“Tani duhet të sigurohemi se kjo marrëveshje është e zbatueshme”, ka thënë Rompuy, pas takimit me kryeministrin Thaçi, në një konferencë për medie.
Rompuy ka thënë se në këtë mënyrë, se si po ecën Kosova, shtetet e BE-së do të jenë në krahun e popullit të saj. “Në këtë mënyrë si po ecni përpara, duke e lënë të kaluarën dhe shikuar kah e ardhmja, shtetet e Bashkimit Evropian do të jenë në krahun tuaj”, ka thënë ai, shkruan ‘Epoka e re’, duke shtuar se Kosova ka bërë një hap shumë të madh drejt Bashkimit Evropian, duke punuar me zell për të arritur përpara.
“Kosova ka bërë një hap shumë të madh nga e kaluara në drejtim të Bashkimit Evropian. Vendi juaj ka punuar me zell në përmbushjen e kritereve evropiane dhe BE-ja ju përgëzon për këto të arritura”, ka thënë Rompuy.
Rompuy, ka thënë se po ndihet i lumtur që po viziton prapë Kosovën, që prej vizitës së tij të parë në vitin 2008, pas shpalljes së pavarësisë.
“Në vizitën time të parë këtu në Prishtine në nëntor të vitit 2008, kur iu adresova Kuvendit tuaj menjëherë pas shpalljes së pavarësisë, në atë kohë isha vetëm kryetar i Parlamentit belg dhe tani jam shumë i lumtur që iu vizitoj këtu në një moment shumë të rëndësishëm për vendin tuaj”, ka thënë Rompuy.
Ai ka thënë se MSA-ja është marrëveshje shumë ambicioze, por ka kërkuar më shumë punë në reformat e nevojshme që duhet bërë në këtë drejtim.
Kryeministri i Kosovës, Hashim Thaçi, ka thënë se është zotuar se Kosova të gjitha angazhimet që do t’i ketë, do t’i zbatojë. “Në mënyrë që të lëvizim me hapat e tjerë në kapitujt e tjerë të Kosovës drejt të ardhmes evropiane, duke punuar maksimalisht që sa më shpejt të ndodhë edhe liberalizimi i vizave”, është shprehur Thaçi.
Ai ka thënë se vullneti i popullit të Kosovës dhe i vizionit politik është e ardhmja evropiane.