Shtëpia Botuese kanadeze ‘IWOI’, në bashkëpunim me Federatën e Shkrimtarëve Shqiptarë në këtë vend, ka promovuar romanin e Përparim Kapllanit “The Last Will” (Amaneti i fundit). Është fjala për një vepër letrare, me elementë të qartë historikë nga gjenocidi që u ushtrua ndaj çamëve në Greqi, gjatë dhe pas Luftës së Dytë Botërore, transmeton “Tema”.
Libri u promovua pikërisht në ditën e gjenocidit çam. Të ftuar ishin shkrimtarët Faruk Myrtaj dhe Fluturak Gërmenji, historiani Olsi Jazexhi, ndërsa nga Shtëpia Botuese kishin ardhur Cheryl Antao Xavier, Brandon Pitts, redaktor dhe shkrimtar nga Los Anxhelos, Jasmine Da Costa me origjinë nga India dhe Susan Munro, poete. Këtë takim e ka nderuar edhe kryetarja e Shoqatës Shqiptaro-Kanadeze, Ruki Kondaj.
Është hera e parë që botohet një vepër e këtij lloji në anglisht me këtë subjekt nga të dyja palët, si nga grekët, ashtu edhe nga shqiptarët. Në këtë promovim u vlerësua se ky libër sjell ndërmend thënien e historianit të njohur, anëtarit të Akademisë Mbretërore Britanike, Dr. Noel Malcolm: “Fati i shqiptarëve çamë është një nga sekretet më të errëta të historisë bashkëkohore evropiane”.