Kryesuesi i Komisionit Qeveritar për të Pagjeturit, Prenkë Gjetaj deklaroi se deri më tani nuk ka asgjë konkrete rreth shkritores së Borit.
Shkritoren e Borit e ka përmendur një qytetar nga Serbia i cili ka thënë se në atë lokacion janë dërguar trupa të të vrarëve nga Kosova.
Ivan Pajiqi, nga Bori i Serbisë, ka deklaruar se si janë bartur trupat e të të vrarëve në luftën e Kosovës në atë vend. Sipas dëshmisë së tij, disa kamionë frigoriferë me trupa kanë përfunduar në një varrezë masive në Petrovo Sello, derisa një kamion tjetër ka përfunduar në shkritoren e Borit, afër Petrovo Sellos.
Kreu i Komisionit Qeveritar për të Pagjeturit, Penkë Gjetaj tha se deri më tani nuk ka asgjë konkrete, transmeton RTK-ja. Ai bëri të ditur se janë në kontakt me dëshmitarin.
“Me dëshmitarin jemi në gjendje të shkojmë edhe në vendin e ngjarjes dhe presim gatishmërinë e tij për të na ndihmuar, sepse, ne do të kërkojmë që të bëjmë vizitë në vendin e ngjarjes, gjegjësisht në vendin e dyshuar. Ne nuk e dimë atë vend, ne po ashtu që tani mund të shprehim gatishmërinë të shkojmë atje, mirëpo pa e pas dëshmitarin, pa e ditë lokacionin e përkufizuar sigurisht ne nuk mund të bëjmë hapa pa u verifikuar”, deklaroi ai.
Por për anëtarin e Komisionit Qeveritar për të Pagjeturit nga radhët e familjarëve, Bajram Çerkinin, deklaratat e Ivan Pajiqit janë të rreme dhe kanë qëllim përfitimin material.
“Unë po ju them familjarëve, janë ka na rrejnë për interesa të veta. Ai po lyp pare, ai po lyp strehim, ai po lyp me ardhë në Kosovë me jetu. Janë do gjëra të cilat po afrohen me u zbulu, me u pa kush ka ba krime. Tash po mundohen me na u afru qata kriminel të cilët ja kanë majt nalt për shumë kohë”.
Ai tha se ka propozuar në Komision që t’i drejtohen Këshillit Evropian, në mënyrë që kjo çështje të diskutohet edhe në strukturat ndërkombëtare. Çerkini tha se ndjen të mos ketë bërë shumë për të pagjeturit dhe nisur nga kjo, ai tha se nuk mund të kërkojë nga Qeveria që të bëjë më shumë për këtë çështje.