Prokuroria akuzon dy zyrtarë dhe dy përfaqësues të një firme për një tender rreth 1.8 milionë eurosh.
Kryetari i Organit Shqyrtues të Prokurimit, Hysni Hoxha, është kujdesur personalisht që një firmë ndërtimore ta bëjë fituese të një tenderi që peshon gati 1.8 milionë euro, shkruan sot Koha Ditore.
Për t’ia dhënë këtë tender, ai akuzohet se ka fshehur dokumente të firmës fituese që do ta eliminonin atë nga gara. Në ndihmë besohet se i ka dalë edhe eksperti i OSHP-së, Hysni Muhadri.
Shkeljet korruptive të kryetarit të OSHP-së që njihet si “gjykata e tenderëve” i ka argumentuar Prokuroria Speciale e Kosovës në një aktakuzë që e ka dorëzuar të enjten në Gjykatën Themelore të Prishtinës.
Prokuroria Speciale e Republikës së Kosovës ka njoftuar se ka ngritur aktakuzë kundër dy zyrtarëve të Organit Shqyrtues të Prokurimit dhe dy zyrtarëve të kompanisë “Conex Group”.