Dy partitë më të mëdha, PDK dhe LDK, të cilat kanë lidhur marrëveshje në parim për bashkëqeverisje, prej sot do ta intensifikojnë punën për arritjen e marrëveshjes finale që do të nënshkruhet nga dy liderët e tyre, Hashim Thaçi dhe Isa Mustafa.
Grupet punuese kanë dizajnuar tekstin e marrëveshjes, ndërsa Thaçi dhe Mustafa pritet ta përfundojnë punën me të, gjatë këtyre dy ditëve.
Të dy ata, siç është paralajmëruar, mund ta kenë një takim të përbashkët sot.
“Ditët e para të javës që vjen do të sjellin institucionet e reja në Kosovë, të dala nga zgjedhjet demokratike dhe nga marrëveshja gjithëpërfshirëse e koalicionit në mes të PDK dhe LDK”, ka deklaruar Hashim Thaçi, të premten.
Ai ka thënë se finalizimi i marrëveshjes së partnerëve të koalicionit do të kryhet gjatë vikendit, ku do të shpaloset edhe arkitektura e re qeverisëse.
Politiko.net ka mësuar se gjatë ditës së sotme do të ndahen Ministritë.
Tema më e përfolur ndërkohë ka qenë posti i Kryeministrit, për të cilin zyrtarë të LDK’së kanë shprehur besimin se do t’ju takojë atyre, ndërsa ata të PDK’së kanë pohuar se nuk kanë hequr ende dorë nga kjo pozitë. A do t’u nxjerrë rrugës telashe kjo çështje? / Politiko.net