Nuk ka dëshmi se në antikë apo në mesjetë Brezovica të jetë përdorur si qendër skijimi. Por një kala, që sipas të gjitha gjasave u ndërtua në antikë si fortifikatë e në periudhën pasuese shërbeu si vendbanim, ka dalë në sipërfaqe, shkruan Koha Ditore.
Vetëm dy vjet gërmime janë bërë në atë që vendasit e njohin si Gradishtë, e për të cilën arkeologët kanë njohuri së paku që nga fundi i dekadës së tetë të shekullit të kaluar. Janë dashur rreth 35 vjet që muret e këtij monumenti të dalin mbi tokë, mu në kodrën që nga 975 metra mbi nivelin e detit e dominon gjithë hapësirën mbi atë që sot është pikë turistike.
Për të gërmuar aty u bashkuan arkeologë nga Instituti Arkeologjik, Muzeu i Kosovës, Universiteti i Prishtinës dhe Qendra Rajonale për Trashëgimi Kulturore në Prizren, të cilët u ndihmuan edhe nga studentët e UP-së dhe punëtorët fizikë që vinin nga fshatrat përreth.
Gërmimet treguan shumëçka, e po kaq lanë të pazbardhur enigmën që pret të zbulohet. Arkeologu Pleurat Kabashi thotë se në përgjigjen përfundimtare për gërmadhën mbi Shtërpcë duhet ende punë. Megjithatë, për “Kohën Ditore” ai rrëfen rezultatet e deritanishme.