Futbollisti me prejardhje nga Kosova, Adnan Januzaj, ka mbetur pa klub pasi që nuk arriti marrëveshje për ta vazhduar kontratën me Real Sociedad-in.
Lajmin për largimin nga klubi, e ka bërë të ditur vetë Real Sociedad, të cilët përmes një postimi në faqen zyrtare, njoftuan se Januzaj dhe Monreal nuk do të jenë më pjesë e klubit spanjoll.
“Real Sociedad njofton se Adnan Januzaj dhe Nacho Monreal nuk do të vazhdojnë në klub për sezonin e ardhshëm”, thuhet në komunikatën e tyre.
“Klubi falënderon Adnan Januzaj dhe Nacho Monreal për angazhimin, përkushtimin dhe përpjekjet e tyre gjatë qëndrimit të tyre me ne, ndërsa u uron atyre më të mirat për të ardhmen e tyre personale dhe profesionale”, përfundon njoftimi i tyre.
Kujtojmë që Januzaj konsiderohej një futbollist me një të ardhme të ndritur sa ishte pjesë e Manchester United.
Mirëpo, nuk shkoi ashtu siç u mendua dhe Januzaj provoi disa aventura tjera huazimesh në Sunderland dhe në Dortmund.
Ai më pas u shit te Real Sociedad-i në verën e vitit 2017 për shumën e 8.5 milionë eurove, ku nënshkroi kontratë pesë-vjeçare.
Gjatë kësaj kohe në Sociedad, Januzaj ka regjistruar 167 ndeshje në të gjitha garat, prej të cilave ka shënuar 23 gola.
/Albanianpost.com