Ambasadori i Holandës në Kosovë, Robert Bosch, i ka dhënë mbështetje rektorit të Universitetit të Prishtinës “Hasan Prishtina”, Ramadan Zejnullahu, në pozicionin e tij për të mos regjistruar studentët nga lista e ofruar nga organizatat e dala nga lufta e UÇK-së.
Sipas diplomatit holandez, standardet e përcaktuara për regjistrimin e studentëve në universitet duhet të respektohen.
“Nuk jemi shumë të përfshirë në sistemin e arsimit, mirëpo ne e përkrahim Rektorin”, tha Bosch në një pyetje të KALLXO.com në forumin e Lëvizjes “FOL” i cili është duke u mbajtur në Prishtinë.
“Mendoj se duhet t’u përmbahemi standardeve dhe këto standarde nuk duhet të ulen për çështje politike”, u shpreh ambasadori Bosch.
Përfaqësuesit e organizatave të dala nga lufta kanë paralajmëruar një protestë gjatë ditës së sotme në kërkim të respektimit të një memorandumi ndërmjet tyre dhe UP-së të nënshkruar në vitin 2009.