Asamblistja e Kuvendit Komunal në Suharekë nga radhët e AAK-së, Besa Kuqi, ka braktisukur këtë parti për t’u bashkuar me PDK-në.
Lajmin e ka bërë me dije vet Kuqi nëpërmjet rrjetit social “Facebook”.
“Të nderuar miq, qytetarë të Therandës, me lejoni që së pari t’i falënderoj të gjithë përkrahësit e mi që me besuan që unë të jem pjesë e Asamblesë Komunale në Suharekë. Dua t’i siguroj që gjithmonë do të jem përkrah tyre, por asnjëherë duke i dëmtuar ata dhe veten brenda një anije ku kapiteni i saj e dërgon drejt fundosjes”.
“Po ashtu falënderoj kolegët e partisë së AAK-së për bashkëpunimin që e patëm deri me sot. Me lejoni të ju njoftoj që nga sot nuk do të jem pjesë e grupit të AAK-së. Nga sot rrugëtimi im politik vazhdon në PDK. Arsyet pse kam marr këtë vendim janë të shumta dhe të shëndosha, andaj besoj që së bashku do të vazhdojmë drejt sfidave të reja të cilat do të na bëjnë më të fort drejt fitoreve të reja”, ka shkruar Kuqi.
Dega e PDK-së në Suharekë është duke u drejtuar nga profesor Ramë Vataj, i cili në të kaluarën ka qenë edhe rektor i Universitetit të Prizrenit “Ukshin Hoti”.
/Epoka e re/