Kryetari i Komunës së Malishevës, Ragip Begaj, ka pritur në një takim pune, përfaqësuesin e shoqatës “Miqtë e Amerikës”, Agim Rexhepi, me të cilin janë dakorduar për vazhdimin e procedurave, për shpalljen e ish ambasadorit amerikan Christopher Hill “Qytetar nderi” i Malishevës, si dhe kanë biseduar për çështje tjera.
Kryetari Begaj, pasi i falënderoi për vizitën dhe angazhimin e shoqatës, në fuqizimin e respektimit të miqësisë me Shtetet e Bashkuara të Amerikës dhe shtetet tjera mike të Kosovës, tha se “Komuna e Malishevës, do të vazhdoj me procedurat për iniciativën e shoqatës “Miqtë e Amerikës, për shpalljen e C.Hill, “Qytetar nderi” i Malishevës.
Ndërsa, themeluesi i shoqatës “Miqtë e Amerikës”, z.Agim Rexhepi, e njoftoi kryetarin me angazhimet e shoqatës në fuqizimin e miqësisë mes SHBA-va dhe Kosovës, kontaktet e shoqatës me personalitetet e ndryshme, me ndikim në shtetin më të fuqishëm në botë, njëherit të shtetit i cili ka dhënë një kontribut të jashtëzakonshëm për Kosovën, para dhe pas luftës.
Iniciativa për shpalljen qytetar nderi i Malishevës, për ish ambasadorin amerikan, Christopher Hill, ka ardhur si rezultat i lidhjeve të krijuara mes Malishevës si trevë dhe Hill-it, gjatë luftës së UÇK-së, vizitat e tij në Dragobil dhe vende tjera, takimet me krerët e UÇK-së, si dhe pas luftës, po ashtu vizita në përurimin e rehabilitimit të ujësjellësit në Banjë, u tha në këtë takim.
Angazhimi i ambasadorit Hill, gjatë luftës, u vlerësua lartë, dhe siç tha kryetari Begaj, “Cristopher Hill, ka merita të jashtëzakonshme në lirinë e Kosovës”.
Realizimi i kësaj iniciative ka filluar në fund të korrik të vitit 2013, ndërsa realizimi i kësaj iniciative, pritet të bëhet në qershorin e këtij viti, me rastin e Ditës së Çlirimit të Malishevës.