Kryetari i Komunës së Malishevës, Ragip Begaj,është takuar me banorët e fshatit Vërmicë.
Ai me banorët e këtij fshati ka biseduar për nevojat e fshatit,për masat mbrojtëse kundër etheve hemorragjike dhe largimin e mbeturinave nga ambienti.
Përfundimi i ndërtimit shkollës, ndërtimi i rrugës për lagjen e Ukajve dhe përfundimi i kanalizimit në lagjet e fshatit,kanë qenë kërkesat kryesore të banorëve të fshatit Vërmicë.
“Deri në shtator, shkolla do të jetë e gatshme për fillimin e procesit mësimor, ndërsa edhe rruga për lagjen e Ukajve, po ashtu do të ndërtohet, sikur edhe përfundimi i kanalizimit të mbetur në gjysmë”,premtoi Begaj.
Nga ana tjetër, me banorët e fshatit, sikur edhe në vendet tjera, është biseduar për masat mbrojtëse që qytetarët duhet të kenë, si preventivë kundër prekjes eventuale nga virusi i etheve hemorragjike, të cilat përcillen nga rriqrat tek njeriu. Kjo fushatë e informimit, është në kuadër të strategjisë kombëtare për luftimin dhe parandalimin e etheve hemorragjike.
Po ashtu, një çështje tjetër e kryetarit të komunës, e debatuar me banorët e Vërmicës, ishte edhe largimi i mbeturinave dhe mbrojtja e ambientit, kërkesë kjo e cila mori mbështetjen e banorëve, për organizimin e një aksioni të përbashkët, për largimin e mbeturinave nga ambientet ku jetojmë dhe për ruajtjen e ambientit.
“Ejani ta pastrojmë vendin tonë, pasi janë ndotur me fusha, me hapësira të gjelbra, me pyje, është ndotur gjithçka që na rrethon, andaj, ejani dhe ta pastrojmë këtë ambient, që të kemi një vend të pastër, dhe të mos jetojmë me këso vendgrumbullime të mbeturinave, të cilat janë edhe burim i infeksioneve të shumta, si dhe burim për shumimin e rriqrave dhe brejtësve të cilët bartin sëmundje të ndryshme”, tha Begaj./PrizrenPress.com/