Një program që dominohet nga tingujt pianistikë. Fiks njëmbëdhjetë mbrëmje muzikore janë pjesë e ofertës, shkruan “Koha Ditore”.
Notat e veprave muzikore të shkruara për këtë instrument do të jetësohen nga muzikantë me nam nëpër botë.
Mbi këto elemente ka zënë fill edicioni jubilar i festivalit muzikor që i dedikohet pianos. Organizatorët e “Chopin Piano Fest Prishtina 2014” tashmë e kanë hartuar programin e edicionit të pestë të festivalit, që do të shtrihet midis datave 7 dhe 27 prill të muajit që vjen.
Besa Luzha, drejtoreshë e festivalit që organizohet nga “Chopin Asociacioni i Kosovës”, ka siguruar se ky edicion do të përfshijë pianistë të shkëlqyer dhe performanca të nivelit të lartë artistik.
“Sivjet nuk do të shënojmë përvjetor të ndonjë kompozitori në veçanti. Festivali po rritet dhe kemi kërkesa nga pianistë të shquar nëpër botë që duan të marrin pjesë, por duhet të kufizohemi për shkak të fondeve, mungesës së sallës etj.”, ka thënë Besa Luzha, drejtoreshë e festivalit.