Ministria e Industrisë, Ndërmarrësisë dhe Tregtisë (MINT), ka bërë të ditur të hënën çmimet maksimale në vend për derivate të naftës brenda 24-orëve.
Çmimi maksimal për naftë është caktuar 1.85 euro, kurse për benzinë, 1.74 euro dhe për gaz, 0.78 centë.
“Ky vendim është marrë pas rritjes së çmimeve të naftës javëve të fundit në Kosovë. 1.Çmimi maksimal i lejuar i produktit Dizel është: 1.85 eurocentë për litër; 2.Çmimi maksimal i lejuar i produktit Benzinë është: 1.74 eurocentë për litër;3. Çmimi maksimal i lejuar i produktit Gas është: 0.78 eurocentë për litër”, njofton MINT.
Sipas kësaj ministrie, këto çmime vlejnë nga ora 10:00 e 27 qershorit deri të nesërmen në kohë të njëjtë.
“Çmimet e lartëcekura vlejnë për datën 27/06/2022 prej orës 10:00 dhe janë valide 24 orë nga data dhe ora e publikimit”, thuhet në këtë njoftim.
Qeveria e Kosovës, më 22 qershor, ka miratuar udhëzim administrativ për rregullimin e çmimeve të derivateve të naftës dhe karburanteve të ripërtëritshme.