Deputeti i Lëvizjes Vetëvendosje nga Prizreni, Artan Abrashi, thotë se vetëm zgjedhjet janë zgjidhje për vendin.
Sipas tij, çdo marrje e pushtetit pa zgjedhje demokratike është jolegjitime.
“Këtë gjë, të huaj dhe vendor për 20 vite na e trumbetuan vazhdimisht”, shprehet Abrashi, shkruan ‘PrizrenPress’.
“Prandaj, vetëm zgjedhjet janë zgjidhja”.
Qeveria e Kosovës në krye me Albin Kurtin u rrëzua ditë më parë nga një mocion i mosbesimit i inicuar nga partneri qeverisës, Lidhja Demokratike e Kosovës.
Mocioni u votua me 82 vota për, 32 kundër, dhe 1 abstenim.
Presidenti i Kosovës, Hashim Thaçi, ndërkaq ka paralajmëruar takim me të gjitha partitë politike për të formuar një qeveri të re.
Kundër idesë së Thaçit ka dalw edhe lideri i LVV-së, Albin Kurti.
Deputeti Abrashi tha se lakmia e paepur për pushtet dhe frika nga humbja e thellë nuk i arsyetojnë shkeljet kushtetuese.
“Lëvizja VETËVENDOSJE! si e vetmja me mandat propozimi për Kryeministër ka vetëm një emër, Albin Kurtin”.
“Atë të cilin, e rrëzuan ligësisht e pabesisht. Çdo variant tjetër për të dalë nga situata që e krijuan vet, Kosovën e fundos në anarki, pasiguri politike dhe paqëndrueshmëri institucionale për një kohë të gjatë. Këtë nuk ia kemi borxh askujt”, shprehet Abrashi./PrizrenPress.com/