Deri më 31 gusht të 2014-tës, Eshref Haxhiu, Afrim Oruçi dhe disa kolegë të tjerë kanë qenë staf mësimdhënës i shkollave të ndryshme të Komunës së Rahovecit. Por, pas shpalljes së konkursit, për vendet e tyre të punës, ata kanë mbetur pa punë.
Sipas tyre, drejtoria e arsimit të kësaj komune, zëvendësimin e tyre e ka bërë nga persona familjarë dhe partiak të partisë në pushtet.
Drejtori i Drejtorisë së Arsimit, Behar Rama, në një prononcim për RTK-në tha se të larguarit, nuk kanë arsimin adekuat. Ai thotë se përzgjedhja e mësimdhënësve është bërë duke u bazuar në diploma e jo në baza partiake.
Deri më tani mësimdhënësit e larguar nga puna kanë dërguar disa ankesa në zyrën e Inspektoratit të Arsimit në Gjakovë. Ata janë në pritje të përgjigjes nga ky institucion ndërsa thonë se, do të vazhdojnë me të gjitha mundësitë e tyre të provojnë se vendimi i DAK-së në Rahovec për largimin e mësimdhënësve të shkollave të kësaj komune ishte i padrejtë.