Në kuadër të aktiviteteve për Muajin Rozë, Kuvendi i Komunës së Dragashit, në bashkëpunim me Klinikën Radiologjike “Prodiagnostix XS” dhe Klubin Futbollistik “Opoja”, organizuan një ligjëratë ndërgjegjësuese me temën “Mbrojtja dhe zbulimi i hershëm i kancerit të gjirit”.
Aktiviteti u mbajt nga dy mjekë të njohur, Dr. Sylejman Krasniqi dhe Dr. Xhemal Nazifi, specialistë të radiologjisë.
Ligjërata u fokusua te rëndësia e diagnostikimit të hershëm dhe masat mbrojtëse kundër kancerit të gjirit, me mjekët që theksuan nevojën për kontrolle të rregullta mjekësore dhe për edukimin e gjerë të publikut mbi simptomat e hershme të sëmundjes. Sipas tyre, zbulimi i hershëm është çelësi për një trajtim të suksesshëm dhe përmirësimin e cilësisë së jetës.
Kryetari i Komunës, Bexhet Xheladini, dhe kryesuesja e Kuvendit, Arijeta Skeraj, përgëzuan organizatorët dhe pjesëmarrësit për iniciativën, duke theksuar rëndësinë e aktiviteteve të tilla në rritjen e ndërgjegjësimit publik dhe parandalimin e kësaj sëmundjeje në nivel lokal.
Pas ligjëratës, në Stadiumin e Qytetit u zhvillua një ndeshje miqësore mes KF “Opoja” dhe KF “Dardanët”, duke i dhënë aktivitetit një karakter sportiv dhe solidarizues në mbështetje të kauzës së Muajit Rozë.
Marketing
Përjetoni pushime të paharruar dhe dasma magjike në Hotel “Albes Residence”
