Dje faqja zyrtare e festivalit BeerFest publikoi lajmin se këngëtarja e njohur e xhazit, Elina Duni, do të interpretojë në edicionin e pestë të këtij festivali i cili filloi sot.
Në faqen e saj zyrtare në rrjetin social, Facebook, Duni ka sqaruar se nuk do të jetë koncert i saj në kuadër të BeerFest por aty do të interpretojë vetëm një këngë, ndërkaq ka konfirmuar koncertin e së shtunës (1 gusht), në Prekaz, ku do të interpretojë bashkë me Gent Rushin, në kuadër të ditëve të mërgimtarëve.
“Nuk do të ketë koncert timin në kuadër të BeerFest-it. Është planifikuar që të këndojë vetëm një këngë me grupin sicilan, por mediat e kanë prezantuar si koncert timin”, sqaroi Duni për KosovaLive.
Sa i përket kryeqytetit, ashtu siç edhe na e konfirmoi para pak ditësh, ajo ka shkruar se do të mbaj koncert në parkun e Gërmisë, më 17 shtator dhe jo më herët.