Nga Hajdar Mallaku
(Në Parlamentin Evropian)
Në Strasburg,
Si vizitor,
Hyra i trembur
Në Parlamentin Evropian.
Jo për fajin e atdheut tim,
As për timin,
A mos për gjuhën e ndarë në dysh
Në mes të Lindjes dhe Perëndimit.
Si kambanë alarmi
Rrinë porositë e tij për ne,
Andej Lindja ndjellakeqe
Rrënon urën e baladës së re.
Si rrëcok pule
Tërhiqemi andej e këndej
E ne ende s’e shtrëngojmë dorën,
Dorën me diell të botës së re.
Te porta fjala shqip e policit:
“Mirësevini në Kuvendin e Demokracisë”,
Ndërsa në kuvendin e urtakëve
Orakulli pret flamurin tonë të pjekurisë.
Kush më mirë se Rilindasit
U lutën për besimin e ri;
Për ku ishim thirrja na fton:
Dielli lind andej nga perëndon.
Strasburg, 28. VII. 2022