Kreu i Nismës për Kosovën, Fatmir Limaj përmes një postimi në llogarinë e tij në Facebook i ka bërë thirrje opozitës dhe gjithë të tjerëve që të bashkohen në një front të përbashkët për ta ndryshuar gjendjen në Kosovë.
Sipas tij, me zhvillimet e fundit po tregohet se gjendja në vend nuk ka qenë asnjëherë me e keqe sesa tash.
“Shteti ynë po rrënohet për çdo ditë para syve tanë”, ka shkruar Limaj ndër tjerash.
Ky është postimi i plotë i Limajt:
VETËM NJË FRONT I BASHKUAR OPOZITAR MUND TA NDRYSHOJË GJENDJEN
Zhvillimet e fundit në vendin tonë besoj që mjaftueshëm tregojnë se gjendja e vendit që nga pas lufta nuk ka qenë asnjëherë më e keqe se tani.
Shteti ynë po rrënohet për çdo ditë para syve tanë.
Filluan me rrënimin e institucioneve të pavarura , vazhduan rrënimin ekonomiko- social të vendit, e që për pasoj pati largimin masiv të dhjetëra mijëra qytetarëve, largim i cili ende po vazhdon.
Negociuan dhe dorëzuan pjesë të sovranitetit të shtetit. Nënshkruan dhënien e territorit tonë Malit të Zi.
Me legalizimin e Bashkësisë së komunave serbe legalizuan entitet të ri politiko-juridik dhe territorial brenda Kosovës, përmes së cilës rrënuan rendin kushtetues-juridik dhe me këtë përfundimisht e ndanë Kosovën në baza etnike.
Përmenda vetëm disa nga të këqijat që ky koalicion qeverisës ia solli Kosovës brenda një periudhe të shkurtër kohore.
Prandaj, duke qenë para një situate të tillë, besoj është moment i fundit që të gjithë ne të cilët e shohim njëjtë këtë gjendje dhe jemi të shqetësuar për të ardhmen e vendit tonë duhet të bashkohemi.
Ndalja e rrënimit të mëtutjeshëm të shtetit tonë është e mundshme vetëm përmes një fronti të përbashkët opozitar.
Me këtë front opozitar nënkuptoj jo vetëm partitë opozitare por edhe shoqërinë civile, intelektual, student, punëtor, të pa punë dhe të gjithë ata të cilët dëshirojnë të angazhohen për të ndalur rrënimin e shtetit para syve tanë.
Ne mund edhe të kemi këndvështrime të ndryshme, por kjo nuk duhet të jetë pengesë për angazhim të përbashkët në funksion të ndaljes së rrënimit të shtetit, kthimin e shpresës tek qytetarët dhe fillimin e ndryshimit të gjendjes